Gjykata Themelore në Ferizaj ka dënuar me shtatë vjet burgim E.M., i cili në qershor të vitit 2021 shkaktoi një aksident rrugor në rrugën Ferizaj-Shtime, ku humbën jetën pesë persona.

Sipas aktgjykimit të gjykatës, E.M. është shpallur fajtor për veprën penale “rrezikim i trafikut publik”.

Në dënimin e tij do t’i llogaritet edhe periudha e kaluar në paraburgim. Po ashtu, E.M.-së i është hequr leja e vozitjes dhe i ndalohet marrja e një leje të re për katër vjet.

Në aksidentin tragjik të ndodhur më 6 qershor 2021, i pandehuri ka dalë nga shiriti i tij duke goditur një veturë që vinte nga kahu i kundërt. Në vendin e ngjarjes kanë humbur jetën katër persona: N.R., Xh.R., S.R. dhe një i mitur, ndërsa viktima e pestë, I.R., ka ndërruar jetë më vonë në Qendrën Klinike Universitare të Kosovës (QKUK).

Gjithashtu, në aksident janë lënduar edhe disa pasagjerë që ndodheshin në veturën e E.M./Arbresh.info